Fossiel
- E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.
Fossiel (Latin: fossilis) ta e restonan preserva di organismo, mata, animal, of microbio dera den sedimento, manera santo, lodo, bou di laman antiguo, lago, y riu. Fossielnan ta inclui tambe cualkier lastro preserva di bida cu ta, tipicamente, mas cu 10.000 aña bieu. Fossiel ta duna un bista util di historia di bida na Tera.[1] Por ehempel, fossiel humano por mustra e detaye di anatomia antiguo, dieet, abilidad di movecion, y comportacion.[2] Ademas, fossiel por mustra con Tera y e medio ambiente a cambia door di tempo geologico. Alabes, fossiel ta provee evidencia relevante pa evolucion y adaptacion di mata y animal na nan media ambiente.[1]
Tin dos tipo di fossiel. E prome tipo ta fossiel di curpa cual ta mustra parti of henter e curpa di un animal of mata antiguo, mientras e sugundo tipo, lastro di fossiel ta rasgo di comportacion antiguo, manera imprenta di pia y cueba.
Fossielnan ta casi semper incompleto representando e parti duro di e organismo antiguo. Por ehempel, vertibrata, manera hende of dinosaurio ta laga nan hueso atras. Normalmente, e musculonan, organonan interno, y cuero desintegra lihe y ta bai perdi.[2] Hueso, cocolishi, y djente por keda conserva pa un gran parti den nan forma original y reemplasa pa mineral cual ta bira piedra duro.[1] Fossiel ta aparece den diferente forma, pero e preservacion mas comun ta e orden di morto, dera, desintegra, reemplaso di tehido cu mineral, y formacion di piedra.[2] Den casonan excepcional, por conserva tambe parti nan suave manera pluma of mata di dorna boket (Polypodiopsida).[1]
|
Mira tambe e kategoria Fossils di Wikimedia Commons pa mas dato mediatiko tokante di e tema aki. |
| Fuente, nota i/òf referensia |